Azərbaycan News Agency

Çinin Təbii Sərvətlər Nazirliyi Cümə günü Dadonggou yatağının kəşfini təsdiqlədi. Bu, Çin Xalq Respublikasının 1949-cu ildə qurulmasından bəri ölkədə bildirilen ən böyük qızıl kəşfidir. Rəsmilər bildiriblər ki, sahədə orta tərkibi ton başına 0.56 qram olan təxminən 2.586 milyon ton filiz mövcuddur və bu, təxminən 1.444 ton qızıla bərabərdir.

Mövcud qiymətlərlə bu həcmdə qızılın dəyəri 166 milyard avronu keçir. Bu il qızılın qiyməti rekord səviyyəyə yüksələrək kiloqramı 115 min avrodan çox olub.

Layihə dövlət müəssisəsi olan Liaoning Geology and Mining Group tərəfindən həyata keçirilib. Təxminən min texnik və işçi cəlb edilməklə cəmi 15 ayda kəşf başa çatdırılıb — bu ölçüdə yataq üçün qeyri-adi dərəcədə qısa müddətdir.

Nazirlik kəşfi “çox böyük”, lakin aşağı tərkibli kimi xarakterizə edib və ilkin iqtisadi səmərəlilik qiymətləndirməsindən keçdiyini bildirib.

Lakin rəsmilər yatağın dəqiq yerini açıqlamayıb, yalnız Liaoninq əyalətinin şərqində yerləşdiyini təsdiqləyib. Bu isə məhdud məlumatın arxasında strateji səbəblərin ola biləcəyi barədə ehtimallara yol açıb.

Son illər Çin mədən kəşfiyyatını sürətləndirib. Rəsmilər bildirib ki, 2024-cü ildə Hunan əyalətində min tondan çox, oktyabr ayında isə Gansuda 40 tondan artıq ehtiyat aşkar olunub. Ölkə 2024-cü ildə ötən illə müqayisədə 0.56 faiz artımla 377.24 ton qızıl istehsal edib.

Daxili istehlak 2024-cü ildə 985.31 tona çatıb, külçə və sikkələrə tələbat isə illik 24 faizdən çox artıb. Analitiklər deyir ki, bu tendensiya qlobal iqtisadi qeyri-müəyyənlik fonunda Çin orta təbəqəsinin sərvətini qorumağa artan marağını əks etdirir və qızılı ölkədə getdikcə daha populyar bir “təhlükəsiz liman”a çevirir.