Azərbaycan News Agency

Prezident Əliyevin çıxışından bəzi əsas məqamlar:

“Bu gün sülh və təhlükəsizlik hər bir ölkənin inkişafı üçün əvəzolunmazdır. Təşkilatımızın əsas sənədi olan Naxçıvan Sazişi sülhün və təhlükəsizliyin qorunmasını əsas məqsədlərdən biri kimi vurğulayır.

Biz yaxşı bilirik ki, təhlükəsizlik təmin olunmadan inkişaf mümkün deyil. Beynəlxalq hüququn norma və prinsiplərinin kobud şəkildə pozulduğu bir dövrdə ölkələrimiz arasında hərbi, müdafiə və texniki sahələrdə əməkdaşlıq ən vacib amillərdən birinə çevrilib. Bu baxımdan biz müttəfiqimiz Türkiyə ilə güclü əməkdaşlığı davam etdiririk.

Təkcə ötən il ərzində Türkiyə ilə 25-dən çox ikitərəfli və çoxtərəfli hərbi təlimlər keçirilib. Ölkələrimiz arasında hərbi və təhlükəsizlik sahəsində mövcud geniş əməkdaşlığı nəzərə alaraq, biz 2026-cı ildə Türk Dövlətləri Təşkilatına üzv ölkələrin Azərbaycanda birgə hərbi təlim keçirməsini təklif edirik.

Müasir dünyada hərbi güc hər bir ölkənin müstəqilliyini və ərazi bütövlüyünü qorumağın əsas elementlərindən biridir.

Biz Ermənistanın işğalını heç vaxt unutmayacağıq. Şəhidlərimizin xatirəsini daim qəlbimizdə yaşadacağıq. Onların qanını döyüş meydanında yerdə qoymadıq. İşğalçını ata torpaqlarımızdan qovduq. Böyük qələbə qazandıq və ədalətli sülhü təmin etdik.”