Azərbaycan News Agency

Fransa Prezidenti Emmanuel Makron Fransa hökumətinin Fələstin Dövlətini tanıyacağına qərar verdiyini bildirib.

Makron bu qərarı sentyabr ayında keçiriləcək BMT Baş Assambleyasında rəsmi şəkildə elan edəcəyini deyərək əlavə edib: “Dərhal atəşkəs təmin olunmalı, bütün girovlar azad edilməli və Qəzza əhalisinə geniş miqyaslı humanitar yardım çatdırılmalıdır. Həmçinin, Həmas silahsızlaşdırılmalı, Qəzzanın təhlükəsizliyi təmin edilməli və bərpa işləri aparılmalıdır. Sonda, Fələstin Dövləti qurulmalı, yaşayış üçün uyğun şərait təmin olunmalı və bu dövlət silahsızlanmanı qəbul edib İsraili tam tanımaqla Yaxın Şərqdə hər kəsin təhlükəsizliyinə töhfə verməlidir.”

Makron vurğulayıb ki, Fransa xalqı Yaxın Şərqdə sülh istəyir və belə deyib:

"Bu sülhün mümkün olduğunu göstərmək biz fransızların, israillilərin, fələstinlilərin və Avropa ilə beynəlxalq tərəfdaşlarımızın üzərinə düşür. Fələstin rəhbərinin mənə verdiyi öhdəliklər əsasında, ona bu məsələ ilə bağlı irəliləməyə qərarlı olduğumu bildirən məktub göndərmişəm."