Azərbaycan News Agency

Hər iki ölkədə ölüm hallarının olduğu bildirilib, o cümlədən Banqkokda tikilməkdə olan bir göydələnin uçması nəticəsində 3 nəfər həlak olub. Hadisə yerində onlarla insanın itkin düşdüyü bildirilir.

Myanma xuntası sərhədin Burma tərəfindəki ölənlərin sayını açıqlamayıb. Lakin hadisə şahidləri və yerli media Mandalay şəhərində, Toungoo və Aungban qəsəbələrində insanların öldüyünü bildirib. Yüzlərlə yaralı Naypyidawdakı xəstəxanaya aparılıb və bina zədələndiyi üçün xəstələr çöldə müalicə olunub.

ABŞ Geoloji Araşdırma Xidməti bildirib ki, zəlzələ yerli vaxtla saat 13:20-də Myanmanın mərkəzində, 10 km dərinlikdə baş verib. Zəlzələnin episentri Mandalay şəhərindən təxminən 17,2 km məsafədə yerləşib.

Myanmadakı zərərin miqyası hələ dəqiq deyil, lakin sosial mediada yayılan görüntülər mərkəzi bölgələrdə çoxlu sayda binanın dağılmasını və ya zədələnməsini göstərir.

Silahlı qruplara torpaqlarının böyük hissəsini itirən Myanma xuntası altı ən çox zərər görmüş bölgədə fövqəladə vəziyyət elan edib və beynəlxalq yardım istəyib.

Mandalay hava limanında çəkildiyi bildirilən görüntülərdə insanlar tozlu dəhlizlərdə qaçır, döşəmədə isə tavan plitələri görünür. Yerli mediada yayımlanan videolarda isə panikaya düşmüş insanların hava limanının qarşısında yerə çökdüyü müşahidə olunur.

Adının açıqlanmasını istəməyən Mandalay sakini bildirib ki, Pyigyitagon qəsəbəsində bir tikili dağılıb, 8 nəfər ölüb, digərlərinin isə dağıntılar altında qalmasından ehtiyat edilir. “Mandalayın bütün şəhəri zəlzələdən təsirlənib. Xilasedici qruplar və xəstəxanalar doludur. Mahalla resurslarımızla idarə edirik”, – deyə qeyd edib.

Myanmada yerləşən Khit Thit Media xəbər agentliyinin yayımladığı görüntülərdə Mandalayda zədələnmiş məscidin qarşısında kərpic və dağıntı yığınları əks olunub. Ən azı 20 nəfərin öldüyü bildirilib, lakin bu rəqəm təsdiqlənməyib.

Reuters-ə danışan iki şahid Bago bölgəsindəki Toungoo şəhərində bir məscidin qismən dağılması nəticəsində ən azı 3 nəfərin öldüyünü bildirib. “Zəlzələ başlayanda dua edirdik... Üç nəfər hadisə yerində öldü”, – deyə şahid bildirib. Yerli media Aungbanda bir otelin uçması nəticəsində ən azı iki nəfərin öldüyünü, 20 nəfərin isə yaralandığını xəbər verib.

Yangon şəhərində keçirilən brifinqdə Beynəlxalq Qırmızı Xaç və Qızıl Aypara Cəmiyyətləri Federasiyasının proqram koordinatoru Mari Manrike deyib:

“Yollar, körpülər və hökumət binaları da daxil olmaqla, ictimai infrastruktur zərər görüb. Hazırda müşahidə altında olan iri su anbarları ilə bağlı narahatlıqlarımız var. Təsirin çox böyük olacağını gözləyirik.”

Banqkok şəhər rəsmiləri paytaxtı fövqəladə zona elan edərək zədələnmiş ərazilərin qiymətləndirilməsini və risk altında olan insanlara yardım göstərilməsini tövsiyə edib.

Şimaldakı turistik Chiang Mai şəhərində qısa müddətli elektrik kəsilməsi zamanı qorxmuş sakinlər həyəcanla çölə qaçıblar.