Azərbaycan News Agency

Baş nazir Ernesto Alvares cümə axşamı gec saatlarda bildirib ki, hökumət bir neçə saat ərzində Limada fövqəladə vəziyyət elan edəcək və artan təhlükəsizsizliklə mübarizə aparmaq üçün bir sıra tədbirlər hazırlayır.

Çərşənbə axşamı gecəsi Z nəsli nümayəndələri, nəqliyyat işçiləri və vətəndaş cəmiyyəti təşkilatları tərəfindən keçirilən etiraz aksiyası korrupsiya və artan cinayətkarlığa qarşı nümayişlərin sonuncusu olub. Bu etirazlar ötən cümə axşamı keçmiş prezident Dina Boluarte-nin gecə yarısı dramatik şəkildə devrilməsi ilə nəticələnmişdi.

Ölkə üzrə minlərlə etirazçı küçələrə çıxıb və yüzlərlə nəfər Limadakı parlament binasının qarşısında polisə qarşı toqquşub. Polis gözyaşardıcı qazdan istifadə edib, bəzi etirazçılar isə fişəng, daş və yanan əşyalar atıblar.

Parlament binasına çataraq onu qoruyan metal baryerləri sındırmağa çalışan etirazçılar “Hamı getməlidir!” şüarları səsləndiriblər və toqquşmalar baş verib.

Ombudsman idarəsinin nümayəndəsi Fernando Losada bildirib ki, etiraz zamanı 32 yaşlı Eduardo Maurisio Ruiz öldürülüb və onun ölümü araşdırılacaq. Peru prokurorluğu Ruiz-in güllələnərək öldüyünü açıqlayıb.