Azərbaycan News Agency

Prezident Administrasiyasının Kommunikasiya İdarəsinin verdiyi məlumata görə, Prezident Ərdoğan ABŞ Prezidenti Tramp ilə telefon danışığı aparıb.

Danışıqlar zamanı Türkiyə ilə ABŞ arasındakı ikitərəfli münasibətlər, həmçinin regional və qlobal məsələlər müzakirə edilib.

Prezident Ərdoğan, Türkiyə və ABŞ-ın müttəfiq olaraq yeni dövrdə əməkdaşlığı həmrəy, səmimi və nəticə yönümlü şəkildə davam etdirəcəyinə tam inandığını ifadə edib.

O vurğulayıb ki, regional və qlobal inkişaflar Türkiyə ilə ABŞ arasında bütün məsələlər üzrə məsləhətləşmələrin gücləndirilməsini zəruri edir.

Ərdoğan, ABŞ Prezidenti Trampın Rusiya ilə Ukrayna arasındakı müharibənin sona çatdırılması üçün atdığı qətiyyətli addımları dəstəklədiklərini, Türkiyənin isə müharibənin başlanğıcından etibarən ədalətli və davamlı sülh üçün çalışdığını və bu səyləri davam etdirəcəyini bildirib.

Türkiyə Prezidenti həmçinin Suriyada sabitliyin bərpasının, sanksiyaların ləğvinin və suriyalı qaçqınların geri dönməsinə şərait yaradılmasının vacibliyini vurğulayıb.

Ərdoğan ABŞ-dan yeni dövrdə terrorla mübarizə sahəsində Türkiyənin maraqlarını nəzərə alan addımlar gözlədiklərini, müdafiə sənayesi sahəsində iki ölkə arasında əməkdaşlığın inkişaf etdirilməsi üçün CAATSA sanksiyalarının ləğvi, F-16 tədarük prosesinin başa çatdırılması və Türkiyənin F-35 proqramına yenidən qoşulmasının vacib olduğunu bildirib.