Azərbaycan News Agency

Görüşdə Türkiyə-Rusiya ikitərəfli münasibətləri, regional və qlobal məsələlər müzakirə olunub. Prezident Ərdoğan qeyd edib ki, regional məsələlərin həllində Türkiyə ilə Rusiya arasında əməkdaşlıq həlledici əhəmiyyətə malikdir. O bildirib ki, Rusiya ilə Ukrayna arasında davam edən müharibənin dayandırılması üçün başlanan prosesi Türkiyə yaxından izləyir və şərəfli, davamlı sülhün təmin olunması üçün, sülh danışıqlarına ev sahibliyi etmək də daxil olmaqla, hər cür dəstəyə hazırdır.

Ərdoğan Qara dənizdə ticarət gəmiçiliyinin təhlükəsizliyinin təmin edilməsi üçün atılacaq xoşniyyətli addımların sülh prosesinə töhfə verəcəyini və Türkiyənin Qara dənizin münaqişə zonasına çevrilməməsi üçün üzərinə düşəni etməyə davam etdiyini bildirib. O, həmçinin qeyd edib ki, Türkiyə Suriya məsələsində Rusiya ilə əməkdaşlığa önəm verir, Suriyanın ərazi bütövlüyü əsasında daimi sülh və sabitliyin təmin olunması üçün birgə çalışmaq vacibdir və etnik və məzhəbi ayrı-seçkiliyi təşviq edən cəhdlərin qarşısı alınmalı, Suriyaya qarşı tətbiq edilən sanksiyalar tamamilə aradan qaldırılmalıdır.

Prezident Ərdoğan əlavə edib ki, Suriyanın təbii ehtiyatları ölkənin öz idarəçiliyinə qaytarılmalıdır, Türkiyə "Suriya Demokratik Qüvvələri"nin mərkəzi idarəyə inteqrasiyasını dəstəkləyir və Suriyanın terror təşkilatları üçün əlverişli məkana çevrilməsinin qarşısı alınması ölkənin sabitliyi üçün həyati əhəmiyyət daşıyır.