Azərbaycan News Agency

ÜST-ün Baş direktoru Qebreyesus bildirib ki, Qəzzada 80 xəstənin yerləşdiyi Əl-Rantisi Xəstəxanasına hücum olub. Ölən olmayıb, lakin hücum xəstələr və personal arasında vahiməyə səbəb olub. O deyib: "Damda yerləşən su çənlərində, elektrik və rabitə sistemlərində və bəzi tibbi avadanlıqlarda ciddi ziyan baş verib."

O qeyd edib ki, 40 xəstə təhlükəsiz yerə köçürülüb, lakin reanimasiyada olan 4 uşaq və 8 yeni doğulmuş körpə daxil olmaqla 40 nəfər içəridə qalıb.

"Əl-Rantisi Qəzza zolağında uşaqlara onkologiya, dializ, tənəffüs müalicəsi və qastroenterologiya sahəsində xidmət göstərən yeganə ixtisaslaşmış uşaq xəstəxanasıdır," - deyə Qebreyesus vurğulayıb.

O bildirib ki, Qəzzaya qarşı hərbi müdaxilə intensivləşdikcə xəstəxanalar, tibb işçiləri və xəstələr təcili qorunmaya ehtiyac duyurlar. "Qəzza daha çox xəstəxana itirməyi gözü ala bilməz. Sağlamlıq heç vaxt hədəf olmamalıdır," - deyə o bildirib.