Qətər İsrailin UNRWA qərargahına hücumuna münasibət bildirdi
Doxa, 9 dekabr (Hibya) – Qətər Xarici İşlər Nazirliyi İsrail qüvvələrinin Şərqi Qüdsdə yerləşən BMT-nin Fələstinli Qaçqınlara Yardım və İşlər Agentliyinin (UNRWA) qərargahına basqın etməsini sərt şəkildə pisləyib.
Bildirilib ki, Qətər Dövləti işğal altındakı Şərqi Qüdsdə yerləşən UNRWA qərargahına edilən bu basqını kəskin şəkildə pisləyir və bunu beynəlxalq humanitar hüququn açıq şəkildə pozulması, eləcə də beynəlxalq ictimaiyyətin iradəsinə açıq meydan oxuma kimi qiymətləndirir.
Qeyd olunub ki, İsrailin UNRWA-nı sistemli şəkildə hədəf alması sonda agentliyi dağıtmağa və Qəzza, Qərb Sahili, İordaniya, Suriya və Livanda milyonlarla fələstinlini əsas xidmətlərdən məhrum etməyə yönəlib.
“Nazirlik beynəlxalq ictimaiyyətin bu plana qəti şəkildə qarşı durmasının və onun dağıdıcı humanitar nəticələrinin qarşısını almasının vacibliyini vurğulayır. Qətər 1967-ci il sərhədləri daxilində paytaxtı Şərqi Qüds olan müstəqil dövlət yaratmaq hüququ da daxil olmaqla, qardaş fələstin xalqının legitim hüquqlarını dəstəkləməkdə qərarlı mövqeyini əsas tutaraq UNRWA-ya tam dəstəyini bir daha ifadə edir.”
Azərbaycan İnformasiya Agentliyi
Facebook
Tweeter
Whatsapp
