Azərbaycan News Agency

Ərzaq qıtlığı və sanitariya çatışmazlığı səbəbindən Qəzzada ciddi iflic xəstəlikləri yayılır. Səhiyyə işçiləri aylarla xəbərdarlıq edirlər ki, İsrail ordusunun Qəzzanın kanalizasiya sistemini dağıtması yoluxucu xəstəliklərin artmasına gətirib çıxara bilər.

Uşaq iflici nadir xəstəlik olsa da, Qəzzada 100-dən çox hadisə diaqnoz edilib.

Ötən il Qəzzada 11 aylıq bir körpəyə uşaq iflici diaqnozu qoyulub; bu, Qəzzada son iyirmi beş ildə görülən ilk hal idi. Həmin vaxt İsrail ordusu uşaqların xəstəliyə qarşı peyvənd olunması üçün hərbi əməliyyatlara müvəqqəti ara verməyə razılaşmışdı.

Təxminən bir il sonra Qəzzadakı həkimlər kəskin boş iflic (AFP) və nadir nevroloji pozğunluq olan Gillian-Barre sindromu da daxil olmaqla nadir iflic xəstəliklərində artım olduğunu bildirdilər.

Amerikanın Politico mediasının xəbərinə görə, Xan Yunisdəki Nəsir Xəstəxanasının baş pediatrı Əhməd əl-Farra bildirib ki, oktyabr 2023-dən əvvəl kəskin boş iflic (AFP) çox nadir rast gəlinən xəstəlik idi. İldə bir və ya iki hal diaqnoz edilirdisə, son üç ayda həkimlər yüzdən çox hal müəyyən ediblər.

İsrail və İordaniyaya analiz üçün göndərilən xəstələrdən götürülmüş nümunələrdə poliovirus ailəsinə aid olan və çirkli içməli su və qida ilə yayıla bilən enterovirus aşkarlanıb.

Əl-Farra bildirib ki, kanalizasiya sularının küçələrdən sərbəst axdığı Xan Yunisdə virusun aşkar olunması təəccüblü deyil.