Azərbaycan News Agency

Nazirin sözlərinə görə, bir sıra xarici brendlərin bazardan çıxması Rusiya sahibkarları və dost ölkələrdən olan şirkətlər üçün unikal imkanlar yaradıb. Onlar bu fürsətlərdən tam şəkildə yararlandılar. Hökumətin, o cümlədən kiçik və orta biznes sektoruna verdiyi dəstək tədbirləri sayəsində yerli istehsalçılar mal və xidmətlərin tədarükünü sürətlə artırmağa nail oldular.

Reşetnikov bildirib: “Rusiya biznes sektoru xarici şirkətlərin bazarı tərk etməsindən sonra yaranan boşluqları doldurmaq üçün böyük sərmayələr yatırıb. Bizim üçün bu investisiyaların özünü doğrultması olduqca vacibdir.”

Eyni zamanda, istehlakçıların maraqlarını qorumaq, rəqabəti təmin etmək və qiymətləri nəzarətdə saxlamaq baxımından bazarın müxtəlifliyinin saxlanılmasının əhəmiyyətini vurğulayan nazir Reşetnikov qeyd edib: “Bu baxımdan, Rusiya bazarı açıq olub və açıq qalmağa davam edəcək. Bütün qərarlar bu iki amilin balansı nəzərə alınaraq ayrıca qəbul ediləcək... Aydındır ki, Rusiya iqtisadiyyatı dəyişib. Buna görə də xarici şirkətlər üçün lokallaşdırma, investisiya və texnologiya sahəsində tələblər tamamilə fərqli olacaq.”

Reşetnikov xatırladıb ki, Rusiya əvvəldən bəyan edib ki, hər hansı sanksiyalara cavabı maksimum iqtisadi açıqlıq və biznes mühitinin yaxşılaşdırılması olacaq. “Nəticə etibarilə, ölkənin biznes və investisiya baxımından cəlbediciliyi əhəmiyyətli dərəcədə artıb. Burada işləmək sərfəlidir və rahatdır”, - deyə o vurğulayıb.

Əvvəllər bir sıra media qurumları və Telegram kanalları mənbələrə istinadən bəzi xarici brendlərin və şirkətlərin, o cümlədən avtomobil markalarının Rusiyaya qayıtmaq planlarından yazmağa başlamışdı.

Rusiya Federasiyası Baş nazirinin müavini Denis Manturov cümə axşamı verdiyi açıqlamada Rusiya hakimiyyət orqanlarının yalnız ölkə üçün maraqlı olan xarici şirkətlərin daxili bazara daxil olmasına icazə verəcəyini bildirib.

Sənaye və Ticarət naziri Anton Alixanov isə qeyd edib ki, Rusiya bazarı tərk etmiş xarici avtomobil brendlərini açıq qucaqla qarşılamır və onların geri qayıtmaq üçün ödəniş etməli olacağını vurğulayıb.