Azərbaycan News Agency

ABŞ-ın Türkiyədəki səfiri Tomas Cozef Barrack, ABŞ-ın Suriyaya xüsusi nümayəndəsi təyin olunduğunu bəyan edib.

Barrack bildirib ki, ABŞ prezidenti Donald Trump firavan bir Yaxın Şərq və qonşuları ilə dinc yaşayan sabit bir Suriya vizyonunu açıq şəkildə ifadə edib. O xatırladıb ki, 13 may tarixində Trump yeni hökumətin ölkədə sabitliyi təmin edə bilməsi üçün Suriyaya qarşı tətbiq olunan dağıdıcı sanksiyaların ləğv olunacağını vəd edib. “Nazir Rubio indi Prezidentin vizyonunu həyata keçirmək məsuliyyətini daşıyır və o, sanksiyaların ləğvinin regionda sülh və təhlükəsizlik üçün inanılmaz imkanlar yaradacağını, münaqişə və müharibələrin sona çatmasına səbəb ola biləcəyini bildirib,” – deyə Barrack qeyd edib.

Barrack, ABŞ-ın Türkiyədəki nümayəndəsi kimi Suriyaya xüsusi nümayəndə təyin olunmasından və bu vizyonun həyata keçirilməsinə dəstək verməkdən qürur duyduğunu bildirib. “Suriyaya qarşı sanksiyaların dayandırılması bizim əsas hədəfimiz olan İŞİD-in tam məğlubiyyətini təmin edəcək və Suriya xalqına daha yaxşı gələcək üçün bir şans verəcək. Bu şəkildə, Türkiyə və Körfəz ölkələri də daxil olmaqla regional tərəfdaşlarımızla birlikdə Suriya hökumətinə sülh, təhlükəsizlik və rifah ümidi qazandırırıq. Prezidentin dediyi kimi: birlikdə çalışacağıq və birlikdə uğur qazanacağıq,” – deyə o əlavə edib.