Azərbaycan News Agency

Hakim Aleksandre de Moraesin bazar ertəsi verdiyi qərara əsasən, sağçı lider ötən ay tətbiq olunan sosial şəbəkə istifadəsi qadağasını pozub.

Moraes yazıb ki, bazar günü ölkənin bir çox şəhərlərində nümayişçilər sabiq prezidentə dəstək üçün küçələrə çıxarkən, Bolsonaronun tərəfdarları sosial media hesabları vasitəsilə Ali Federal Məhkəməyə qarşı hücuma açıq çağırışlar və Braziliya məhkəmə sisteminə xarici müdaxiləni açıq şəkildə dəstəkləyən mesajlar yayıblar.

Bolsonaronun işi ilə bağlı ABŞ tərəfindən sanksiya tətbiq olunan hakim, sabiq prezidentin paytaxt Braziliyanın cənubundakı palma ağacları ilə əhatələnmiş kirayə malikanəsində ev dustaqlığına alınmasını əmr edib. Ziyarətlər yalnız yaxın ailə üzvləri və vəkillərlə məhdudlaşdırılıb.

Federal polisin malikanədəki bütün mobil telefonları toplaması əmr edilib.

Sabiq prezidenti ziyarət etməyə icazəsi olan şəxslərə telefon istifadə etməyə, şəkil və video çəkməyə icazə verilməyəcək.

Bolsonaronun mətbuat katibi bazar ertəsi axşam bildirib ki, onun telefonuna polis tərəfindən əl qoyulub və o, Braziliyadakı iqamətgahında ev dustaqlığına alınıb.

Bolsonaronun vəkilləri sabiq prezidentin heç bir məhkəmə qərarını pozmadığını və qərara etiraz edəcəklərini bildiriblər.