Azərbaycan News Agency

Saatda 230 km sürətlə əsən küləklərlə gələn super tayfun "Ragasa"nın bazar ertəsi seyrək əhalisi olan şimal adalarına çatacağı və sonra qərbə – Cənubi Çinə doğru hərəkət edəcəyi gözlənilir.

Filippin Meteorologiya Bürosu, "Ragasa"nın 3 metrdən yüksək dalğalarla "həyati təhlükə yaradan güclü fırtına dalğası riski" daşıdığını bildirib.

Paytaxt Manila da daxil olmaqla ölkənin böyük bir hissəsində məktəblər və dövlət idarələri bağlanıb və rəsmilər genişmiqyaslı daşqınlar, torpaq sürüşmələri və evlərdə, infrastrukturlarda ziyan ola biləcəyi barədə xəbərdarlıq ediblər.

Ragasa-nın quruya çıxmasının gözlənildiyi uzaq Batanes və ya Babuyan adalarında təxminən 20.000 insan yaşayır, onların çoxu yoxsulluq içindədir.

"Ragasa"nın Tayvana birbaşa zərbə vuracağı gözlənilmir, lakin adanın şərq sahillərinə güclü yağışlar gətirəcəyi ehtimal olunur.

Cənubi və şərqi Tayvandakı meşəlik ərazilər və təbiət parkurlarının bazar ertəsi səhərindən etibarən bağlandığı və bəzi bərə reyslərinin də dayandırıldığı bildirilib.