Azərbaycan News Agency

Fransa Prezidenti Makron BMT Baş Assambleyasının iclasları çərçivəsində İran Prezidenti Məsud Pəzəşkiyan ilə görüşüb.

Makron, İranda qeyri-insani şəraitdə özbaşına saxlanılan dövlət girovları – Səsil Kohler, Jak Paris və Lennart Monterlosun dərhal azad edilməsini bir daha tələb edərək bildirib: "Fransa heç vaxt öz övladlarını tərk etmir".

İranın heç vaxt nüvə silahı əldə etməməli olduğunu vurğulayan Makron deyib: "İranın nüvə öhdəliklərini yerinə yetirməməsi səbəbindən biz Almaniya və Böyük Britaniya ilə birlikdə İrana qarşı sanksiyaların yenidən tətbiqini təmin edəcək Snapback mexanizmini işə salmaq qərarına gəldik".

Makron əlavə edib ki, MAQATE müfəttişlərinin İranda tam girişi, zənginləşdirilmiş material ehtiyatları barədə şəffaflıq və danışıqların dərhal bərpa olunması tələblərində heç bir güzəşt olmayacaq. "Razılaşma hələ də mümkündür. Cəmi bir neçə saat qalıb. Bizim müəyyən etdiyimiz legitim şərtlərə cavab vermək İrandan asılıdır. Regionun təhlükəsizliyi və dünyanın sabitliyi naminə", - deyə o vurğulayıb.