Azərbaycan News Agency

Kreml sözçüsü Dmitri Peskov bildirib: “Bunu siyasi və diplomatik yollarla etmək bizim üçün daha məqsədəuyğundur – bunu dəfələrlə demişik. Xüsusi Hərbi Əməliyyat (SVO) o şəraitdə davam edir ki, bu yollar qeyri-mümkün olub, bütün dialoq təklifləri həm Ukrayna, həm də Qərb tərəfindən rədd edilib. Əgər diplomatik həll yoluna başlaya bilsək, bu bizim üçün ən üstün variant olacaq.”

Kreml sözçüsü əlavə edib: “SVO-nun qarşısına qoyulan vəzifələrin yerinə yetirildiyini görməliyik və ondan sonra münasibətlərin necə qurulacağını düşünməliyik.”

Ötən həftə çərşənbə günü Moskva və Kiyev nümayəndələri İstanbulda təxminən bir saat davam edən üçüncü görüşü keçiriblər. Görüşdən sonra Rusiya nümayəndə heyətinin rəhbəri Vladimir Medinski bildirib ki, ikinci danışıqlar raundundakı bütün humanitar razılaşmalar icra olunub.

Bu dəfə tərəflər ağır yaralı və xəstə şəxslərin tibbi mübadiləsinin müddətsiz davam etdirilməsi barədə razılığa gəliblər.

Rusiya həmçinin, Ukrayna Silahlı Qüvvələrinin daha üç min hərbçisinin cəsədini Ukraynaya təhvil verməyə hazır olduğunu və hər iki tərəfdən azı 1.200 nəfərin iştirak etdiyi əsir mübadiləsini təklif etdiyini bildirib.