Azərbaycan News Agency

İsrailin Ynet qəzeti xəbər verir ki, Netanyahunun yaxın çevrəsindən olan yüksək vəzifəli şəxslər deyiblər: “Zarlar atılıb – məqsədimiz tam fətihdir. Baş Qərargah rəisi razılaşmırsa, istefa verməlidir.”

İsrail Baş naziri Benyamin Netanyahu hərbi əməliyyatların genişləndirilməsinin tərəfdarıdır, HƏMAS isə danışıqlara qayıtmadan əvvəl humanitar vəziyyətin həll olunmasını tələb edir.

Mənbə CNN-ə bildirib ki, müdafiə qurumu girovların saxlanıldığı düşünülən bölgələrdə quru əməliyyatlarının genişləndirilməsinə qarşıdır, çünki bu, girovları təhlükə altına sala bilər.

İsrailli əsgərlərin analarından ibarət bir qrup planları tənqid edib və bunun həm girovlar, həm də hərbçilər üçün ölümcül olacağını deyib. Fələstin Administrasiyası beynəlxalq ictimaiyyəti müdaxiləyə çağırıb.

İsrailin Xarici İşlər naziri Gideon Saar hücumun genişləndirilməsi planları ilə bağlı bazar ertəsi bildirib ki, bu, “bütün girovların geri qaytarılması və qismən razılaşma üzrə danışıqların uğursuzluğundan sonra bu müharibənin başa çatdırılması istəyini əks etdirir”.

İsrail hökumətinin bu yanaşmasının ABŞ Prezidenti Donald Trampın Yaxın Şərq nümayəndəsi Steve Witkoff-un yanaşması ilə uyğun olub-olmadığı isə bəlli deyil.