Azərbaycan News Agency

New York Times qəzetinin xəbərinə görə, ABŞ-ın Daxili İşlər naziri Daq Burqum bazar ertəsi günü bildirib ki, Co Baydenin dekabr ayında imzaladığı və Alyaskanın Milli Neft Ehtiyatı (NPR-A) ərazisində 23 milyon hektarlıq sahədə qazıntını qadağan edən sərəncamı ləğv edəcək.

Burqum bazar ertəsi Alyaskada Ətraf Mühitin Mühafizəsi Agentliyinin rəhbəri Li Zeldin və enerji naziri Kris Rayt ilə birlikdə çıxış edib.

O bildirib ki, Bayden administrasiyası “istehsaldan çox maneə yaratmağa” üstünlük verir və Baydenin sərəncamı “Amerikanın enerji müstəqilliyinin həmişəkindən daha vacib olduğu bir vaxtda yerli resurslardan istifadə qabiliyyətimizi zəiflədir”.

Donald Tramp yanvar ayında ikinci prezidentlik müddətinin ilk günündə “milli enerji fövqəladə vəziyyəti” elan edib və fosil yanacaq sənayesini dəstəkləyən bir sıra icra sərəncamları verəcəyini vəd edərək seçki kampaniyası şüarını təsdiqlədi: “Qaz, gözəlim, qaz”.

Ekoloji təşkilatlar uzun müddətdir ki, Alyaskanın təbii neft və qaz ehtiyatlarına görə ABŞ prezidentinin əsas hədəfi olacağından narahat idilər və nəsli kəsilməkdə olan Arktik canlıların yaşaması üçün həyati əhəmiyyət daşıyan bir ərazidə qazıntı aparılmasını tənqid edirlər.