Azərbaycan News Agency

Zelenski bildirib ki, hücumlar 12 saatdan çox davam edib və bu, “adi şəhərləri hədəf alan qəsdən törədilmiş terror aktı” olub.

Bildirilir ki, Rusiya İran istehsalı “Shahed” pilotsuz uçuş aparatları da daxil olmaqla təxminən 500 PUA və 40-dan çox raket, o cümlədən hipersəsli “Kinzhal” raketlərindən istifadə edib.

Hücumlar xüsusilə paytaxt Kiyev və ətrafı ilə yanaşı, Zaporijjya, Xmelnitski, Sumı, Mykolaiv, Çerniqov və Odessa bölgələrini hədəfə alıb. Kiyevdə Kardiologiya İnstitutu binası da zədələnib. Məlumata görə, biri 12 yaşlı qız olmaqla 4 nəfər həlak olub. Ölkə üzrə ən azı 40 nəfər, o cümlədən uşaqlar yaralanıb.

Hücumlar zamanı çörək istehsalı müəssisəsi, rezin zavodu, yaşayış evləri və müxtəlif mülki infrastruktur da ziyan görüb. Zelenski bütün zəruri xidmətlərin sahədə fəaliyyət göstərdiyini bildirib.

Zelenski bəyanatında hücumun BMT Baş Assambleyasının həftəsindən dərhal sonra baş verdiyinə diqqət çəkərək, Rusiyanın müharibə və zorakılıq siyasətini davam etdirmək niyyətini açıq şəkildə ortaya qoyduğunu bildirib.