Azərbaycan News Agency

Ukrayna Prezidenti Volodimir Zelenski BMT Baş Assambleyasında çıxış edib.

Onun çıxışından bəzi əsas məqamlar:

«XXI əsr keçmişdən çox fərqlidir, çünki bir millət sülh istəyirsə, silahlanma üzərində işləməlidir. Bu, doğrudan da çətin vəziyyətdir, amma başqa cür yaşamaq mümkün deyil. Siz bilirsiniz ki, güclü dostlarınız olmadıqda beynəlxalq hüquq heç bir nəticə vermir. Onlarsız müharibədə vəziyyət daha da pis olardı, çünki dostlardan və silahlardan başqa heç bir təhlükəsizlik zəmanətimiz yoxdur.

Bunu ukraynalılar seçməyiblər. Bütün bunları əvvəldən bilsəydik, fərqli prioritetlərimiz olardı. Ukrayna xalqı sülh və müstəqil dövlətində yaşamaq istəyən bir xalqdır. Bizim prioritetimiz sülh və azadlıq içində yaşamaqdır.

Rusiya ölkəmə hücumlarını davam etdirir və hələ də atəşkəs yoxdur, çünki Rusiya razılaşmır.

Keçən il bu zalda dünyanı Rusiyanın işğalı və Avropanın ən böyük atom elektrik stansiyası olan Zaporojye ilə bağlı təhlükə barədə xəbərdar etmişdim. Təəssüf ki, heç nə dəyişməyib. Dünən yenidən Zaporojyeda işıqlar sönüb və Rusiya bölgəni artilleriya atəşinə tutmağa davam edir. Bu dəlilik beynəlxalq institutların zəifliyi səbəbindən davam edir.

Rusiya dronları Polşanın hava məkanını pozdu və xoşbəxtlikdən onların 4-ü məhv edildi. Əgər bu baş verməsəydi, nəticələr dəhşətli ola bilərdi. Estoniya tarixində ilk dəfə BMT Təhlükəsizlik Şurası təcili iclasa çağırıldı, çünki Rusiya hərbi təyyarələri qəsdən onun hava məkanını pozdu.

Moldova özünü Rusiyanın müdaxilələrindən qorumağa çalışır. Bir vaxtlar Livanda ediləni, indi Rusiya Moldovada etməyə çalışır, amma təəssüf ki, qlobal reaksiya yenə də kifayət etmir. Avropada artıq Gürcüstanı itirmişik. Dövlət sistemində Avropa ruhu tədricən yox olur və Gürcüstan Rusiyadan asılı vəziyyətə düşür. Rusiya bölgəni getdikcə daha çox təhlükə altına salır.

Silahlar kimin sağ qalacağını müəyyənləşdirir. Demək olar ki, dünyanın hər yerindən zorakılıq xəbərləri gəlir və onların əksəriyyəti atəşli silahlarla bağlıdır. İnsanlar bəlkə buna öyrəşirlər, amma silahlar bizim özümüzü müdafiə qabiliyyətimizdən daha sürətlə inkişaf edir.

Bəşəriyyət tarixində ən dağıdıcı silahlanma yarışındayıq. Bu yarışda artıq süni intellekt də iştirak edir. Əgər bu sahədə real zəmanətlər təqdim olunmasa, dünyada təhlükəsiz bir yer qalmayacaq.»