Azərbaycan News Agency

ÜST baş direktoru Gebreyesus vurğulayıb ki, Qəzzada dərman və tibbi ləvazimatların əsas təchizatçısı olan təşkilat, münaqişənin yaratdığı böyük maneə və çətinliklərə baxmayaraq, Kerem Şalom vasitəsilə həyati əhəmiyyətli yardımların çatdırılmasını davam etdirir.

Bu genişmiqyaslı logistika əməliyyatının bir hissəsi olaraq ÜST-nin, səhiyyə tərəfdaşlarının həyati materialları gətirməsini dəstəklədiyini qeyd edən Gebreyesus deyib: “Ötən həftə əlil arabaları, qoltuq ağacları və gəzinti vasitələri kimi tibbi avadanlıq, sərf materialları və yardımçı cihazlar daşıyan 8 yük maşını Qəzzaya daxil olub.”

O bildirib ki, son dərəcə az olan bu cihazlar əsas müstəqilliyin bərpası, həyati tibbi xidmətlərin göstərilməsi və dərinləşən böhranda ilişib qalmış yaralı və əlillərə dəstək üçün həyati əhəmiyyət kəsb edir.

Gebreyesus təxminən 3 min nəfərin bu cihazlardan faydalanacağını bildirərək əlavə edib: “Təcili olaraq daha çoxuna ehtiyac var. Qəzzanın böyük sağlamlıq tələbatının ödənilməsinə davamlı dəstəkləri üçün donorlarımıza təşəkkür edirik.”