Azərbaycan News Agency

Bəyanatda bildirilib ki, Əfqanıstan Talibanı, Fitna-e-Hindustan və Fitna-e-Khawarij qrupları “əsassız hücumlar” həyata keçiriblər.

Açıqlamada bu hücumların “Pakistan və Əfqanıstan arasında sülhsevər qonşuluq və əməkdaşlıq ruhuna zidd olduğu” qeyd edilib.

Pakistanın özünümüdafiə hüququndan istifadə edərək hücumlara cavab verdiyi və Taliban qüvvələri ilə əlaqəli ünsürlərə “ağır itkilər” verdirdiyi bildirilib. Həmin ünsürlərin Pakistana qarşı terror hücumlarının planlaşdırılması və asanlaşdırılmasında rol oynadığı irəli sürülüb.

Rəsmilər əməliyyat zamanı mülki itkilərin qarşısının alınması üçün maksimum diqqət göstərildiyini vurğulayıblar.

Bəyanatda, həmçinin, Pakistanın Əfqanıstanla dialoq və diplomatik münasibətlərə əhəmiyyət verdiyi vurğulanaraq, “Ölkəmizin ərazi bütövlüyünü və xalqımızın təhlükəsizliyini qorumaq üçün bütün zəruri tədbirlər görüləcək. Hər hansı yeni təxribat qətiyyətlə cavablandırılacaq.” ifadələri yer alıb.