Azərbaycan News Agency

Bazar ertəsi günü temperaturun artmasından sonra, ölkə hələ də ekstremal istilik riski səbəbindən yüksək xəbərdarlıq vəziyyətində olarkən, Portuqaliya üç böyük meşə yanğınını söndürmək üçün əlavə qüvvələr göndərdi.

Trankozu bölgəsinin Freşeş kəndindəki yanğınla 650-dən çox yanğınsöndürən, 226 texnika və altı helikopterlə mübarizə aparıldı.

Yüksək temperatur və güclü küləklərin təsiri ilə yayılan yanğın, ən azı dörd yaxın kəndin sakinlərini təhdid etdi.

Yerel mətbuat, yanğında altı yanğınsöndürən də daxil olmaqla ən az 17 nəfərin xəsarət aldığını bildirdi.

Rəsmilər, Palhais, Reboleiro, Aldeia Nova və Aldeia Velha kəndlərini bürüyən meşə yanğınlarının ən narahatedici olduğunu söylədi.

Bazar günü günortadan sonra, Kovilya bələdiyyəsinə bağlı Sobral de São Miguel kəndində baş verən yanğını söndürmək üçün təxminən 400 yanğınsöndürən cəlb edildi.

Beiraş və Serra da Estrela Alt Region Komandanlığından bir mənbə yerli mediaya açıqlamasında “vəziyyətin müsbət istiqamətdə irəlilədiyini” və “bəzi yerlərdə yanğının artıq nəzarət altına alındığını, lakin üç cəbhədə hələ də aktiv olduğunu” bildirib.

Bazar gecəsi, Kovilya meri Vitor Pereyra, yanğının bazar ertəsi səhərinə qədər nəzarət altına alına biləcəyini proqnozlaşdırdı.

Üçüncü bir yanğınla mübarizə aparmaq üçün ən azı 86 yanğınsöndürən Távora və Pereiro kəndlərinə göndərildi.

İyul ayından etibarən, temperaturun artması və ölkənin böyük bir hissəsinin ekstremal istilik riski altında olması səbəbindən, Portuqaliya yanğınlarla mübarizə aparmaq üçün minlərlə yanğınsöndürəni səfərbər edib.

Bazar ertəsi etibarilə, ölkədə ən azı 12 bölgə yüksək istilik səbəbindən narıncı xəbərdarlıq altındadır. Portuqaliya Fövqəladə Hallar İdarəsi, kənd yerlərində yanğın riski səbəbindən materik hissənin yüksək xəbərdarlıq vəziyyətində olduğunu bildirib.

Portuqaliya Milli Təbiəti Mühafizə və Meşələr İnstitutu (ICNF), iyulun ortalarına qədər meşə yanğınlarının 10.768 hektar ərazini yandırdığını, bunun ötən ilin eyni dövrü ilə müqayisədə üç dəfə çox olduğunu bildirib.

ICNF, ölkədə yanğınların 2017-ci ildən bəri daha aqressiv hala gəldiyini qeyd edib.