Azərbaycan News Agency

Almaniya kansleri Olaf Şolts, İranın İsrailə qarşı həyata keçirdiyi raket hücumunu qınadığını bildirib.

Şolts, bu hücumun onsuz da gərgin olan Yaxın Şərqdə vəziyyətin daha da gərginləşmə riski daşıdığını vurğulayaraq deyib: "İran bütün bölgəni alova atmaq təhlükəsi ilə üz-üzədir və bu, nə olursa olsun, qarşısı alınmalıdır. Hizbullah və İran İsrailə qarşı hücumlarını dərhal dayandırmalıdır".

Kansler Şolts, dünən İranın hücumunun İsrailin hava hücumundan müdafiə qüvvələri və müttəfiqləri sayəsində böyük ölçüdə dəf edildiyini vurğulayaraq, əlavə edib:

"Tərəfdaşlarımızla birlikdə İsrail ilə Hizbullah arasında atəşkəs əldə etmək üçün mübarizəni davam etdirəcəyik. Belə bir atəşkəs, Hizbullahın İsraillə sərhəd bölgəsindən çıxmasını açıq şəkildə nəzərdə tutan BMT Təhlükəsizlik Şurasının 1701 saylı qətnaməsinin tam şəkildə icrasının başlanğıcı olmalıdır".