Azərbaycan News Agency

ABŞ Prezidenti Donald Tramp rəsmi səfəri çərçivəsində Böyük Britaniyanın Baş naziri Keir Starmerlə birgə mətbuat konfransı keçirir.

Tramp birgə mətbuat konfransında dedi: “Düşünürdüm ki, Ukraynadakı müharibə Putinə münasibətlərimə görə asanlıqla həll olunacaq, amma Putin məni məyus etdi. Doğrudan da məni çox məyus etdi”.

Trampın çıxışından əsas məqamlar:

“Bu möhtəşəm qonaqpərvərliyə sözlərlə ifadə olunmaz dərəcədə minnətdaram. ABŞ və Böyük Britaniya çox yaxın müttəfiqlərdir. Texnologiya sazişi ABŞ və Böyük Britaniyaya növbəti böyük texnoloji inqilaba çiyin-çiyinə rəhbərlik etməyə imkan verəcək.

Rusiya Prezidenti Putin məni Ukrayna məsələsində məyus etdi. Düşünürdüm ki, bu, ən asan məsələ olacaq, amma proses orada mürəkkəbləşdi. Ukrayna məsələsinin necə nəticələnəcəyini görəcəyik.

İsrail və Qəzzadakı vəziyyət də qarışıqdır, bəli, amma bunu da həll edəcəyik. İndiyədək 7 müharibəni bitirmişik”.

“Böyük Britaniyanın müdafiə öhdəliklərini alqışlayırıq. Ümid edirik ki, Böyük Britaniya ilə birlikdə azadlıq dəyərlərini müdafiə edəcəyik”.

Britaniyanın Baş naziri Starmer isə belə dedi:

“Trampla Ukraynanın müdafiəsinə dəstəyimizi artırmağın yollarını müzakirə etdik. Bu gün müdafiəmizi necə gücləndirəcəyimizi, Ukraynaya daha çox necə dəstək verəcəyimizi və Putinə davamlı sülh sazişinə nail olması üçün təzyiqi necə qətiyyətlə artıracağımızı müzakirə etdik.

Sülh və yol xəritəsi mövzusunda tam həmfikrik. İsrail–Fələstin məsələsini də müzakirə etdik. Fələstinin tanınması addımı sülh planı çərçivəsində görülməlidir.

Qanunsuz miqrasiya ciddi problemdir. Geri qəbul sazişinin işləməsi vacibdir. Miqrant məsələsini həll etməliyik”.