Azərbaycan News Agency

Qəzzaya yardım aparan Sumud donanmasının təşkilatçıları bildiriblər ki, onlar əsas gəmilərinin dünən dron hücumuna məruz qaldığına inanırlar. Gəmi, həftəsonu İspaniyadan Qəzzaya gedərkən Tunis’in Sidi Bou Said limanından təxminən 80 km uzaqlıqda demir atmışdı.

Sosial şəbəkədə yayılan açıqlamada, səfərin bütün əsas təşkilatçılarının gəmidə olduğu və onların çoxunun tanınmış şəxslər olduğu qeyd olunub. İsveçli iqlim fəalı Greta Thunberg yəqin ki, onların ən məşhurudur.

Gəmidə xəsarət alan olmadığı güman edilir. Tunis Milli Qvardiyası gəmidə xilasedici jiletlərdə yanğın baş verdiyini təsdiqləyib, lakin dron fəaliyyətinə dair heç bir əlamət tapmadığını bildirib.

Milli Qvardiya dron hücumu ilə bağlı ehtimalların əsassız olduğuna inanır və sosial mediada yanğının siqaret kötüyündən çıxdığını irəli sürür. Lakin istintaq davam edir.

Mağrib Sumud donanmasının Tunisdən çıxışı bir neçə gün təxirə salınıb. Sumud donanması İsrailin Qəzza Zolağı blokadasını yararaq müharibədən zərər görmüş əhaliyə müxtəlif yardım materialları çatdırmağı hədəfləyir. Birləşmiş Millətlər Qəzzanın bir neçə bölgəsində rəsmi olaraq aclıq elan edib və ən azı yarım milyon insanın çətin şəraitdə yaşadığını təxmin edir.

Fəallar donanmanı hər hansı bir hökumətdən və ya siyasi partiyadan asılı olmayan bir icma kimi təsvir edirlər. Ərəb dilində “Sumud” sözü qətiyyət deməkdir.