Azərbaycan News Agency

Prezident Zelenski, hazırda ölkənin İqtisadi İnkişaf və Ticarət naziri olan Yuliya Sviridenkonu baş nazir postuna namizəd kimi irəli sürüb. 2020-ci ildən bəri baş nazir vəzifəsində olan Denis Şmıqal istefa verib. Ukrayna parlamenti – Verxovna Rada – hələ ki, Sviridenkonun namizədliyini təsdiqləməyib.

Zelenski onun namizədliyini elan edərkən belə yazıb: “Bu gün Yuliya Sviridenko ilə görüşdüm. Ona Ukrayna hökumətinə rəhbərlik etməyi və baş nazirin birinci müavini və iqtisadiyyat naziri kimi qazandığı təcrübə ilə Ukrayna istehsalı və innovasiyalarını dəstəkləməklə işini davam etdirməyi təklif etdim.”

Amma Zelenski qeyd edib ki, Şmıqal ölkəni tərk etməyəcək, yeni Ukrayna müdafiə naziri vəzifəsinə təyin olunacaq. O, Şmıqalın təcrübəsinin, hazırda ən böyük məsuliyyəti daşıyan Müdafiə Nazirliyində faydalı olacağını bildirib.

Sviridenkonun ABŞ hökuməti ilə Ukraynadakı faydalı qazıntı ehtiyatlarının işlənməsi üzrə razılığın əldə olunmasında əsas rol oynadığına inanılır. Bu razılaşma ABŞ-ın Rusiya ilə müharibədə Ukraynaya dəstəyini davam etdirməsinin şərtlərindən birinə çevrilib.