Azərbaycan News Agency

Ukrayna xarici işlər naziri Andriy Sıbıha Polşa və Litva xarici işlər nazirləri ilə birlikdə Lublin Üçbucağı xarici işlər nazirləri toplantısını keçirib.

Sıbıha bildirib ki, regional təhlükəsizliyin gücləndirilməsi, müdafiə əməkdaşlığının inkişaf etdirilməsi, Ukraynanın müdafiə potensialının artırılması və Rusiyaya təzyiqin gücləndirilməsi ilə bağlı koordinasiyalı addımlar müzakirə olunub. O əlavə edib: “Ukraynanın Avropa İttifaqı və NATO-ya üzvlük prosesini necə irəli aparacağımızı da müzakirə etdik. Üç ölkə olaraq Ukraynanın bu iki təşkilata tam üzvlüyü məsələsində ortaq və qəti mövqeyimiz var.”

Sıbıha əlavə edib ki, iqtisadiyyat, logistika, nəqliyyat, biznes və digər sahələrdə əməkdaşlıqlar da qiymətləndirilib və deyib:

“Lublin Üçbucağı çərçivəsində ortaq tariximiz və birgə tarixi tədqiqatlarla bağlı dialoqu gücləndirmək üçün “Tarixçilər Forumu” yaratmaq qərarına gəldik. Liderlərimizə Kiyevdə Lublin Üçbucağı formatında zirvə görüşü keçirilməsini təklif edəcəyik və nazirlər səviyyəsində görüşlərin ildə ən azı iki dəfə keçirilməsi ilə bağlı razılığa gəldik.”