Yamaykalılar qasırğanın 5-ci kateqoriyaya çatması ilə sığınacaqlara gedirlər
Stokholm, 28 oktyabr (Hibya) – Yamaykalılar 5-ci kateqoriyalı “Melissa” qasırğasının sahilə yaxınlaşması fonunda, dağıdıcı daşqınlar, torpaq sürüşmələri və infrastrukturda böyük ziyan barədə xəbərdarlıqlarla birlikdə sığınacaqlara çəkilməyə başlayıblar.
1851-ci ildən bəri Yamaykaya dəyən ən güclü və yavaş hərəkət edən bu nəhəng qasırğa çərşənbə axşamı səhər tezdən quruya çatacaq və bir müddət ada üzərində qalacaq.
Meteoroloqlara görə, fırtına adanı diaqonal şəkildə keçəcək, cənubda St. Elizabeth bölgəsindən daxil olub, şimalda St. Ann ətrafından çıxacaq.
Bazar ertəsi gec saatlarında fırtına Kinqstondan təxminən 240 kilometr cənub-qərbdə və Kubanın Qvantanamo şəhərindən təxminən 530 kilometr cənub-qərbdə idi və küləklərin maksimum sürəti 280 km/saat təşkil edirdi. Mayamidə yerləşən ABŞ Milli Qasırğa Mərkəzinə görə, fırtına saatda 4 kilometr sürətlə şimal-şimal-şərq istiqamətində hərəkət edirdi.
ABŞ Milli Qasırğa Mərkəzi bildirib ki, Yamaykanın şərq hissələrinin bəzilərində yağıntıların həcmi bir metrə çata bilər, Haitinin qərbində isə 40 sm-ə qədər yağıntı düşə bilər. Fəlakət miqyasında daşqınlar və çoxsaylı torpaq sürüşmələri ehtimal olunur.
Baş nazir Endryu Holness bildirib: “Bu bölgədə 5-ci kateqoriyalı qasırğaya tab gətirə biləcək infrastruktur yoxdur. İndi əsas sual bərpanın sürətidir. Əsl çətinlik budur.”
Azərbaycan İnformasiya Agentliyi
Facebook
Tweeter
Whatsapp
