Azərbaycan News Agency

Uzun müddətdir ABŞ-ın əsas müttəfiqi olan Danimarka, son vaxtlar Trampın yarı muxtar Danimarka adası Qrenlandiyaya olan iddiaları səbəbilə onun hədəfinə çevrilmişdir. Bu arada, ABŞ-ın yeni tarifləri 10 faizə endirilsə də, artıq Aİ-nin əsas bazarlarından birinə ixracatı əngəlləyir.

Tramp dəfələrlə bildirib ki, ABŞ milli təhlükəsizlik maraqları naminə, Amerikanın hərbi bazalarının yerləşdiyi Qrenlandiyanın nəzarətini ələ keçirməlidir. Danimarka rəsmiləri bu ideyanı qətiyyətlə rədd etdilər və indi Kanadada olduğu kimi, Trampın onu ABŞ-ın 51-ci ştatı etmək istədiyi bir vaxtda istehlakçılar da öz mövqelərini göstərirlər.

Kopenhagendə yerləşən Føtex supermarketinin əməkdaşı Sanne CNBC-yə deyib: “Alıcıların Trampa qarşı kiçik bir etiraz göstərmələrinin yeganə yolu budur.”

Başqa bir alıcı əlavə edib: “Yalnız münaqişəyə görə deyil, həm də standartlara görə Avropa məhsullarını ABŞ məhsullarına üstün tuturam. İndi münaqişə daha da kəskinləşib.”

Føtex, Bilka və Netto supermarketlər şəbəkələrinin sahibi olan Salling Group, ötən ay Danimarka, Almaniya və Polşada yerləşən 1700-dən çox mağazada Avropa məhsullarının qiymət etiketlərinə ulduz işarəsi əlavə edərək ABŞ məhsullarından imtinanı asanlaşdırıb.

Salling Group-un sözçüsü bildirib ki, bu addım ABŞ məhsullarına qarşı “boykot” deyil, sadəcə olaraq Avropa məhsulları haqqında daha aydın məlumat istəyən müştərilərin suallarına cavabdır.