Azərbaycan News Agency

Prezident Zelenski qeyd edib ki, Rusiya ordusu ötən gecə ölkə üzrə mülki infrastruktur obyektlərinə və yaşayış binalarına hücumlar həyata keçirib.

Zelenski vurğulayıb ki, Zakarpatya bölgəsində ABŞ investisiyaları ilə dəstəklənən və qəhvə maşını kimi gündəlik tələbat malları istehsal edən mülki müəssisəyə bir neçə qanadlı raket atılıb.

Müəssisədə baş verən yanğının hələ də söndürülməyə çalışıldığı və hücum nəticəsində 15 nəfərin yaralandığı bildirilib. Yaralılara zəruri yardım göstərilib.

Qeyd olunub ki, Zaporojyadan Volinə qədər bir çox bölgələrdə operativ qruplar xidmət aparır.

Gecə boyu Ukraynaya ümumilikdə 574 pilotsuz uçuş aparatı (PUA) və 40 raket atılıb; onların əhəmiyyətli bir hissəsi zərərsizləşdirilib.

Zelenski deyib: "Ruslar bu hücumu elə həyata keçirdilər ki, guya heç nə dəyişməyib, guya müharibəni dayandırmaq üçün qlobal səylər yoxdur. Bu, cavab tələb edir. Moskvanın hələ də müharibəni bitirmək və danışıqlara başlamaq niyyətində olduğuna dair real siqnal yoxdur. Təzyiqə ehtiyac var. Güclü sanksiyalar, yüksək gömrük rüsumları. Kömək edən hər kəsə təşəkkür edirəm."