Azərbaycan News Agency

İsveç Baş naziri Ulf Kristersson Aİ liderləri ilə apardığı danışıqlarda Ukrayna sülh planına dair qiymətləndirmələrini bölüşüb.

Kristersson çıxışında deyib: “Mesajım budur ki, Rusiyanın qonşu ölkələrə qarşı aqressiyasının heç vaxt nəticə verməməsi İsveçin maraqlarına uyğundur.”

Baş nazir, Rusiyanın Ukraynadakı hücumlarının Avropa İttifaqı üçün də birbaşa risk yaratdığını vurğulayaraq əlavə edib: “Əks halda bu gün Ukraynada baş verənlər sabah Avropa İttifaqındakı üzv ölkələrdən birini təsir edə bilər.”

Kristersson qeyd edib ki, demokratiyalar daimi və ədalətli sülh üçün fasiləsiz çalışırlar, lakin bununla belə, Rusiyanın yenidən Xarkovu bombaladığına diqqət çəkib.

Rusiyaya təzyiqin artırılmasının zəruriliyinə toxunan Baş nazir deyib: “Aİ və ABŞ-ın sanksiyaları Rusiya iqtisadiyyatına ziyan vurur, lakin Rusiyaya təzyiqin daha da artırılması lazımdır. Atmalı olduğumuz növbəti addım Avropa ölkələrindəki bank hesablarında dondurulmuş rus aktivlərinə əl qoymaqdır.”

O, bu vəsaitlərin Ukraynanın müdafiəsini gücləndirmək və Rusiyanın vurduğu ziyanın ödənilməsi üçün istifadə edilməsini təklif edərək əlavə edib: “Unutmayın ki, əgər Rusiya qoşunlarını geri çəkib Ukraynanın torpaqlarını sülh içində tərk etsə, Ukraynadakı müharibə bu gün də bitə bilər.”