Azərbaycan News Agency

BBC-nin məlumatına görə, Wang Fuk Court kompleksində başlayan yanğın yaxınlıqdakı göydələnlərə də yayılıb. Yanğının binaların xaricindəki bambuk skafoldlardan keçdiyi güman edilir. Hadisə yerinə təcili yardım və xilasedici qruplar göndərilib. Kompleksdə 4 600 nəfər yaşayır və təxminən 2 000 mənzil var.

Honq Konq hökuməti yanğının yerli vaxtla saat 14:51-də başladığını açıqlayıb.

Yanğın səbəbindən Tai Po avtomobil yolunun bir hissəsi bağlanıb və avtobuslar başqa marşrutlara yönləndirilib.

Polis kompleksə yaxın iki binanı təxliyə edib və həlak olanlarla bağlı məlumat üçün qaynar xətt yaradıb.

Sabiq rayon şurası üzvü Herman Yiu Kwan-ho yerli mətbuata bildirib ki, Tai Po-da yanan göydələnlərdə ən azı 13 nəfər hələ də çıxılmaz vəziyyətdə qalıb.

Rəsmilər yanğının səviyyəsinin ən yüksək – 5-ci səviyyəyə qaldırıldığını deyiblər.

South China Morning Post-un məlumatına görə, 13 nəfər həlak olub, ən az 16 nəfər ağır yaralanıb. Ölənlərdən biri yanğınsöndürən olub.

Yanğının söndürülməsinə 128 yanğınsöndürən maşın, 57 təcili tibbi yardım avtomobili, 767 yanğınsöndürən və 400 polis əməkdaşı cəlb edilib.

Bildirilib ki, bu il bambuk skafoldlarda bir neçə yanğın baş verib və ən azı beş nəfər həyatını itirib. Yanğının səbəbinin araşdırılması üçün genişmiqyaslı istintaq tələb olunur.