Azərbaycan News Agency

Şimali Kıbrıs Türk Cümhuriyyətinin 9-cu prezident seçkilərində 7 namizəd iştirak edir, onlardan 5-i müstəqildir.

24 avqustda başlayan seçki təqviminə əsasən, seçki təbliğatı dünən saat 18:00-da başa çatıb.

Prezident seçilmək üçün namizəd etibarlı səslərin mütləq çoxluğunu qazanmalıdır. Əgər heç bir namizəd bu səviyyəyə çatmasa, ən çox səs toplayan iki namizəd arasında ikinci tur 26 oktyabr bazar günü keçiriləcək.

Konstitusiyaya görə, prezident seçilmək üçün namizədin millət vəkili seçilmək hüququna malik olması, ali təhsilli olması, 35 yaşını tamamlaması, türk valideynlərdən doğulması, KKTC vətəndaşı olması və ən azı 5 ildir Kıbrısda daimi yaşaması tələb olunur.

Bu gün saat 19:00-a qədər radio, televiziya və bütün media orqanlarına seçkilərlə və nəticələrlə bağlı xəbər, təxmin və şərh yaymaq qadağandır.

Ümumilikdə 218.313 seçici ölkə üzrə yaradılmış 777 seçki məntəqəsində səs verə biləcək.

Bu gün keçirilən prezident seçkiləri 1974-cü ildən bəri Kıbrıs türklərinin 11-ci dövlət başçısı seçkisi olacaq.

1974-cü il Sülh Hərəkatından sonra Kıbrıs türkləri öz dövlətləri çərçivəsində ilk dövlət başçısı seçkilərini 20 iyun 1976-cı ildə keçiriblər. 45 il ərzində onlar 2 dəfə Kıbrıs Türk Federativ Dövləti prezidentliyi və 8 dəfə KKTC prezidentliyi seçkilərində iştirak ediblər. 19 oktyabr seçkiləri KKTC-nin 9-cu prezident seçkisi kimi tarixdə yer alacaq.

KKTC-də prezident və millət vəkili seçkiləri hər 5 ildən bir, bələdiyyə seçkiləri isə hər 4 ildən bir keçirilir.