Azərbaycan News Agency

Şənbə günü İtaliyanın "Corriere della Sera" qəzetində dərc olunmuş müsahibəsində Abbas deyib: "Hər iki tərəflə əlaqədəyik. Tramp ilə uzun telefon söhbətim oldu, bu söhbətdə müharibənin (Qəzza Zolağında) başa çatdırılması və Səudiyyə Ərəbistanı, ABŞ, Misir, İordaniya və bu məsələlərə maraq göstərən digər ölkələrin iştirakı ilə davamlı sülh anlaşması barədə danışdıq."

Abbas, PNA-nın Qəzzanın idarəsini üzərinə götürməyə hazır olduğunu bir daha vurğuladı. Eyni zamanda, Hamasın bu prosesdə iştirakını istisna etdi. "Qəzza Zolağı Fələstin Milli İdarəsi tərəfindən idarə edilməlidir. Hamas xalqımızın bir hissəsidir, onu görməzdən gəlməyi düşünmürük. Lakin Hamasın idarəetmə funksiyaları olmamalıdır," deyə o bildirib.

Fələstin rəhbəri İsrail qüvvələrinin Qəzza Zolağından tamamilə çəkilməsində israr etdiyini vurğulayıb.

O əlavə edib: "Biz beynəlxalq hüquq normalarına uyğun fəaliyyət göstəririk. ABŞ-ın təşəbbüsü ilə BMT tərəfindən qəbul edilmiş 2735 saylı qərar mövcuddur. Bu qərar əsirlərin azad olunmasını, İsrail qüvvələrinin Misir sərhədi boyunca Qəzza Dəhlizindən və Qəzzanın özündən tam çəkilməsini nəzərdə tutur. Bizə başqa anlaşma lazım deyil."