Azərbaycan News Agency

Avropa Kosmik Agentliyinin (ESA) məlumatına görə, indiyədək qeydə alınmış üçüncü ulduzlararası obyekt olan 3I/ATLAS Yerə maksimum 269 milyon kilometr məsafəyə yaxınlaşacaq. Bu məsafə Yer ilə Günəş arasındakı orta məsafədən demək olar ki, iki dəfə çoxdur.

Alimlər bildirirlər ki, 3I/ATLAS daxili Günəş sistemi boyunca hərəkəti zamanı Yerə və ya digər planetlərə heç bir təhlükə yaratmır.

Kometanın qeyri-adi xüsusiyyətləri və trayektoriyası – ilk dəfə 1 iyul tarixində Çilinin Río Hurtado şəhərində ATLAS teleskopu tərəfindən müşahidə olunması – internetdə böyük marağa səbəb olub və onun yadplanetlilər tərəfindən göndərildiyi də daxil olmaqla müxtəlif nəzəriyyələrin yaranmasına gətirib çıxarıb.

Ulduzlararası kometalar son dərəcə nadirdir və Günəş sistemindən çox-çox uzaqda dünyaların necə formalaşdığına dair ipucları daşıyan qalaktikamızın həqiqi xarici elementləri kimi təsvir olunur.

Rentgen şüaları ilə müşahidə edilən ulduzlararası kometanın ilk görüntüləri kometa nüvəsi ətrafında geniş yayılmış rentgen parıltısını üzə çıxarıb və ulduzlararası kometaların Günəş sistemindəki kometalar kimi rentgen şüalarında parlayıb-parlamadığına dair uzunmüddətli sirrə aydınlıq gətirib.

Səma müşahidəçiləri üçün 3I/ATLAS-ın orbitası onun Yerə çılpaq gözlə görünəcək qədər yaxınlaşmayacağını göstərir.

ESA-nın açıqlamasına görə, ən yaxın məsafədə 3I/ATLAS hətta kiçik bir teleskopla belə sübh öncəsi səmada müşahidə edilə bilər. NASA-nın bildirdiyinə görə, kometa 2026-cı ilin yazına qədər müşahidə oluna biləcək və bir qədər daha parlaq ulduz kimi görünəcək.

Açıqlamada deyilir: “3I/ATLAS-ın dəqiq mövqeyi ESA-nın interaktiv xəritəsində real vaxt rejimində izlənilə bilər. 3I/ATLAS-ın yaxınlaşması Virtual Telescope Project tərəfindən təqdim olunan pulsuz canlı yayımda da izlənəcək. Hava şəraiti əlverişli olarsa, canlı yayım 19 dekabr tarixində CET 05:00-da (TSİ 07:00) başlayacaq.”