Azərbaycan News Agency

Litva xarici işlər naziri Kestutis Budris iddia edib ki, Belarus qeyri-qanuni yollarla NATO hava məkanına daxil olur. O, sosial mediada paylaşdığı açıqlamada deyib: “Belarus qaçaqmalçılığı silaha çevirərək NATO hava məkanını pozur. Meteoroloji şarlarla başlayan qaçaqmalçılıq, mülki aviasiyaya qəsdən müdaxiləyə çevrilib və hava limanlarımızın dəfələrlə bağlanmasına səbəb olub. Bunlar təsadüfi hadisələr deyil, qərarlılığımızı sınamaq məqsədilə edilən qəsdən hibrid hücumlardır.”

Budris, Newsmax kanalına verdiyi müsahibədə isə bu hücumlar qarşısında susmamağın vacibliyini vurğulayıb: “NATO-nun hava məkanı avtoritar təcrübələr üçün sınaq meydanı deyil. Hava hücumundan müdafiəmizi gücləndirməli, daha çox radar sistemləri əldə etməli və Belarus üzərində zəruri təzyiq göstərməliyik.”