Azərbaycan News Agency

CENTCOM bildirib ki, ABŞ Prezidenti Donald Trampın göstərişi ilə 27 iyun tarixində İrandakı çoxsaylı hərbi hədəflərə əlavə hava zərbələri endirilib.

CENTCOM-un açıqlamasına görə, ABŞ-ın bir gün əvvəl M/V Ever Lovely adlı kommersiya gəmisinə qarşı iddia edilən İran hücumuna cavab olaraq keçirdiyi əməliyyatlardan sonra Tehrana atəşkəsə əməl etmək imkanı verilib. Lakin iddia olunur ki, İran qüvvələri səhər saatlarında Hörmüz boğazı yaxınlığında hərəkət edən, Panama bayrağı altında üzən və iki milyondan çox barel xam neft daşıyan M/T Kiku tankerinə kamikadze tipli pilotsuz uçuş aparatı ilə hücum ediblər.

Açıqlamada bildirilir ki, kommersiya dəniz daşımalarına qarşı hücumlara cavab olaraq ABŞ qüvvələri İranın hərbi müşahidə infrastrukturu, rabitə sistemləri, hava hücumundan müdafiə vasitələri, pilotsuz uçuş aparatlarının saxlanıldığı obyektlər və dəniz minalarının yerləşdirilməsi imkanlarını hədəfə alıb.

CENTCOM vurğulayıb ki, Hörmüz boğazından kommersiya gəmilərinin keçidi davam edir və ABŞ qüvvələri bölgədə xidmətini davam etdirərək mümkün təhdidlərə qarşı tam hazırlıqlı vəziyyətdədir.