Azərbaycan News Agency

Çin Qiymətli Kağızlar Tənzimləmə Komissiyasının təsdiqi ilə hər iki metal üzrə üç fyuçers müqaviləsi Guangcou Fyuçers Birjasında ticarətə çıxarılıb. Platin üçün baza qiymət qramı 57,2 dollar, palladium üçün isə qramı 51,55 dollar müəyyən edilib.

Platin və palladium avtomobil qaz emissiyasına nəzarət, külək enerjisi və hidrogen enerjisi kimi “yaşıl sənaye” sahələrinin əsas xammalıdır. Çində istifadə olunan platinın təxminən 60%-i, palladiumun isə 80%-i bu sahələrə gedir.

Platin qrup metallarının dünyada ən böyük istehlakçısı olan Çin idxala yüksək dərəcədə bağlıdır və bu, yerli şirkətləri beynəlxalq qiymət dəyişiklikləri və təchizat zənciri risklərinə məruz qoyur.

Dünya Platin İnvestisiya Şurasının Asiya-Sakit okean üzrə direktoru Denq Veybin bildirib: “Bu il üçillik çatışmazlıqdan sonra platin qiymətləri kəskin artıb ki, bu da Çin şirkətləri üçün xərclərin artması və qiymət riskləri yaradıb. Bu, platin və palladium fyuçerslərinin işə salınmasının nə qədər vacib olduğunu göstərir.”

Guangzhou Financial Holdings Futures şirkətinin tədqiqatçısı Li Jun qeyd edib ki, son beş ildə platin və palladiumun illik qiymət dəyişkənliyi 20%-dən çox olub və buna görə müəssisələr qiymət risklərini idarə etmək üçün törəmə alətlərdən istifadə etməyə maraqlı olacaqlar.

O əlavə edib ki, gələcəkdə Cənubi Afrika və Rusiya kimi böyük tədarükçülərin platin qrup metalları birbaşa Çin bazarına yuanla hesablaşan müqavilələrlə çıxara biləcəyi gözlənilir.