Dörd Avropa lideri Kiyevə gedir
London, 10 May (Hibya) – Böyük Britaniya, Fransa, Almaniya və Polşa liderləri şənbə günü Kiyevə simvolik bir səfərə gedirlər. Bu səfər Vladimir Putinin Qızıl Meydanda hərbi parad keçirməsindən bir gün sonraya təsadüf edir.
Səfər ABŞ-ın Ukraynaya qarşı böyük hava hücumu ilə bağlı kəşfiyyat xəbərdarlığından sonra baş tutur.
Downing Street-in cümə gecəsi verdiyi açıqlamada deyilir ki, Keir Starmer, Emmanuel Makron, Friedrich Merz və Donald Tusk şənbə günü səhər saatlarında Kiyevə çatacaq və Prezident Volodimir Zelenski ilə görüşərək Ukraynaya dəstək nümayiş etdirəcəklər.
Dörd liderin birgə bəyanatında deyilir: “Fransa, Almaniya, Polşa və Birləşmiş Krallığın liderləri olaraq, Rusiyanın vəhşi və qeyri-qanuni genişmiqyaslı işğalına qarşı Ukrayna ilə həmrəylik içində Kiyevdə dayanacağıq.”
Dörd Avropa lideri səfər zamanı şərtsiz 30 günlük atəşkəs çağırışlarını bir daha təkrarlayacaqlar. Donald Tramp və ABŞ administrasiyası bunun davamlı sülh sazişinə gedən yolda ilk addım ola biləcəyini bildirib. Ukrayna bunu həyata keçirməyə hazır olduğunu bildirib, lakin Rusiya indiyədək rədd edib.
Lakin liderlər artıq Ukraynaya gedərkən, ABŞ-ın Kiyevdəki səfirliyi cümə gecəsi “növbəti bir neçə gün ərzində istənilən vaxt baş verə biləcək əhəmiyyətli hava hücumu” ilə bağlı ictimai xəbərdarlıq yayımladı. Əlavə təfərrüatlar verilməyib.
Azərbaycan İnformasiya Agentliyi
Facebook
Tweeter
Whatsapp
