Azərbaycan News Agency

Aİ Komissiyasının sədri fon der Leyen Bondi çimərliyində baş verən faciəvi hücumdan dərin sarsıntı keçirdiyini bildirib.

Həlak olanların ailələrinə və yaxınlarına səmimi başsağlığı verdiyini qeyd edən fon der Leyen deyib: “Avropa Avstraliyadakı və dünyanın dörd bir yanındakı yəhudi icmalarının yanındadır. Zorakılığa, antisemitizmə və nifrətə qarşı birlikdəyik.”

Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi və Avropa Komissiyasının vitse-prezidenti Kaya Kallas Avstraliyanın Bondi çimərliyi bölgəsində Hanuka qeyd etmələri zamanı baş verən silahlı hücuma aid sarsıdıcı görüntülərin onu dəhşətə gətirdiyini bildirib.

Yəhudi icmasını hədəf alan bu iyrənc zorakılıq aktının heç bir tərəddüd olmadan ən sərt şəkildə pislənməli olduğunu vurğulayan Kallas deyib:

“Düşüncələrim hücumdan zərər çəkən hər kəslə, onların ailələri və cəsarətlə vəzifə başında olan ilk müdaxilə qrupları ilədir. Avstraliya Avropanın ən yaxın dostlarından biridir. Avstraliya xalqı ilə tam həmrəylik içindəyik.”