Azərbaycan News Agency

Birləşmiş Ərəb Əmirliklərində yerləşən Flydubai şirkətinin Dubay-Təl-Əviv reysini həyata keçirən sərnişin təyyarəsində pilotlar arasında mübahisə səbəbindən qaçırılma həyəcanı verilib.

İsrail mətbuatında yer alan məlumatlara görə, içərisində təxminən 100 İsrail vətəndaşı olan təyyarə İordaniya hava məkanı üzərində uçarkən əvvəlcə ümumi fövqəladə vəziyyəti bildirən "7700", daha sonra isə təyyarənin qaçırılmasını göstərən "7500" kodunu yayıb.

Siqnallardan sonra İsrail Hərbi Hava Qüvvələrinə məxsus qırıcı təyyarələrin havaya qalxdığı bildirilib. Sərnişin təyyarəsinin bir müddət İordaniya hava məkanında dövrə vurduqdan sonra Səudiyyə Ərəbistanına yönləndirildiyi və orada eniş etdiyi qeyd olunub.

İsrail Baş nazirinin ofisinin sözçüsü isə hadisənin təyyarə qaçırılması olmadığını açıqlayıb. İsrail mətbuatı da qaçırılma həyəcanının pilotlar arasındakı mübahisə səbəbindən verildiyini bildirib.