Azərbaycan News Agency

Prevot qeyd edib ki, bombardmanlar qəsdən mülki şəxsləri, yaşayış məhəllələrini, xəstəxanaları, enerji infrastrukturunu və əsas xidmətləri hədəf alır və bu hücumlar uşaqlar da daxil olmaqla günahsız insanların ölümü və yaralanması ilə nəticələnir.

O, bunların müharibə cinayətləri olduğunu vurğulayaraq deyib: “Bunlar Ukrayna xalqının ruhunu sındırmağa yönəlmiş sistemli strategiyanın bir hissəsidir. Bununla belə, bu vəhşiliyə baxmayaraq, ukraynalılar fövqəladə cəsarətlə ayaqda qalmağa davam edirlər. Terror qarşısında onların göstərdiyi müqavimət ən dərin hörmət və həmrəyliyimizi haqq edir.”

Prevot həmçinin Azərbaycanın Kiyevdəki səfirliyinə edilən hücumdan danışaraq bildirib ki, diplomatik missiyanın hədəf alınması qəbuledilməzdir və beynəlxalq sistemi ayaqda saxlayan prinsiplərin birbaşa pozulması deməkdir.

O əlavə edib ki, Belçika Azərbaycanın və hücumdan təsirlənən bütün diplomatik əməkdaşların yanındadır və Ukrayna xalqına müraciətlə deyib: “Avropa və beynəlxalq tərəfdaşlarımızla birlikdə, bu qanunsuz və mənəviyyatsız müharibə bitənə qədər Ukraynaya dəstəyimizi davam etdirəcək və Rusiyaya təzyiqləri artıracağıq.”