Azərbaycan News Agency

Türkiyənin yüksək texnologiyaya əsaslanan sənaye transformasiyasında fəaliyyət göstərən SEMSIS (Superior Electromagnetic Systems), inkişaf etdirdiyi orijinal elektrikli mobillik texnologiyaları ilə qlobal miqyasda elektrikli avtomobil istehsal müəssisələri qurmaq üçün texniki və mühəndislik potensialına çatdığını bəyan edib. Şirkət bu infrastrukturu sənaye investisiyalarına çevirmək məqsədilə yerli və xarici investorlarla strateji əməkdaşlıqlara açıq olduğunu bildirib.

Yerli texnologiya şirkəti SEMSIS mikroavtomobil seqmentində hazırladığı innovativ həllərlə mobillik anlayışını yenidən formalaşdırır. Şirkətin patentli mühərrik-generator texnologiyaları və hibrid enerji çevrilmə sistemləri sayəsində bir dəfə enerji doldurmaqla 1000 kilometrdən artıq məsafə qət edə bilən yeni nəsil avtomobillər mümkün olur.

SEMSIS rəsmiləri vurğulayırlar ki, bərpa olunan enerji mənbələrindən maksimum səmərəliliklə istifadə edən bu sistemlər sadəcə nəqliyyat vasitəsi deyil, iqtisadi, ekoloji və uzunməsafəli kompleks mobillik həlli təqdim edir. İnkişaf etdirilən texnologiyaların xüsusilə şəhərdaxili və mikro mobillik sahəsində inqilabi xarakter daşıdığı qeyd olunur.

2010-cu ildə 5746 saylı Ar-Ge Qanunu çərçivəsində yaradılan SEMSIS yerli mühəndislik, patentli sistemlər və miqyaslana bilən istehsal platformalarına fokuslanaraq elektrikli nəqliyyat sahəsində kompleks həllər inkişaf etdirib.

Qeyd edilir ki, SEMSIS daxilində hazırlanmış elektrikli avtomobil platformaları L7 seqmentindən kommersiya və şəhər mobilliyi həllərinə, modul şassi və ötürmə sistemlərindən aşağı investisiya xərcli çevik istehsal xətlərinə qədər geniş texnoloji infrastrukturu əhatə edir.

Şirkət rəsmiləri SEMSIS modelinin patentli yerli texnologiyalara əsaslanması, xarici asılılığın azaldılması, enerji səmərəliliyi və istehsalın sürətli miqyaslana bilməsi ilə klassik montaj investisiyalarından fərqləndiyini vurğulayıblar.

Elektrikli mobilliklə yanaşı, enerji çevrilmə sistemləri, hibrid və sıfır emissiyalı itələmə həlləri üzərində də Ar-Ge işləri aparan SEMSIS-in orta və iri miqyaslı sənaye investisiyaları üçün açar-təslim texnologiya və mühəndislik dəstəyi təqdim edə biləcəyi bildirilib.

Rəsmilər qlobal miqyasda artan elektrikli avtomobil tələbinə uyğun olaraq SEMSIS texnologiyaları ilə qurulacaq istehsal müəssisələrinin yüksək əlavə dəyər və dayanıqlı inkişaf potensialına malik olduğunu diqqətə çatdırıblar.