Azərbaycan News Agency

İtaliyanın xarici işlər naziri Antonio Tajani Türkiyənin xarici işlər naziri Hakan Fidan ilə telefon danışığı barədə açıqlama verib.

Tajani bildirib ki, danışıq zamanı ilk növbədə Livandakı vəziyyəti müzakirə ediblər və Romada davam edən danışıqların hərtərəfli razılaşmanın həyata keçirilməsi istiqamətində yeni addım olacağına ümid etdiklərini ifadə edib.

Atəşkəsin möhkəmləndirilməsinin vacibliyini vurğulayan Tajani qeyd edib ki, bölgədə beynəlxalq iştirak gələcəkdə də davam etməlidir.

Tajani əlavə edib ki, Qəzzadakı vəziyyət də müzakirə olunub və Türkiyənin HƏMAS-ın tərksilahına dair razılaşmanın əldə edilməsindəki rolunu yüksək qiymətləndirdiklərini bildirib.

O qeyd edib ki, bu addım Yaxın Şərqdə "ədalətli və davamlı sülh" üçün mühüm əhəmiyyət daşıyır.

İki nazir həmçinin Hörmüz boğazı və Qırmızı dənizdə gəmiçilik azadlığının təmin edilməsinin enerji təhlükəsizliyi və beynəlxalq ticarət baxımından vacibliyini vurğulayıblar.

Tajani bildirib ki, İtaliya və Türkiyə regional böhranların həlli üçün əməkdaşlığı davam etdirmək və siyasi, eləcə də iqtisadi əlaqələri gücləndirmək əzmindədir.