Azərbaycan News Agency

Ukrayna Xarici İşlər Nazirliyi, ATƏT Nazirlər Şurasının iclasından sonra 42 ölkənin Rusiyanın Ukraynadakı mülki enerji infrastrukturuna hücumlarını pisləyən birgə bəyanat yaydığını bildirib.

Bəyanatda qeyd olunur ki, Rusiya 2022-ci ildə başlamış genişmiqyaslı hücumlar çərçivəsində Ukraynanın bütün ərazisində enerji infrastrukturunu hədəfə alıb, bunun nəticəsində mülki şəxslər arasında itkilər baş verib, yaşayış binaları və enerji obyektləri ciddi zərər görüb və bir çox bölgədə fövqəladə elektrik kəsintiləri yaranıb. Qış şəraitinin bu hücumların nəticələrini daha da ağırlaşdırdığı vurğulanır.

Beynəlxalq Atom Enerjisi Agentliyinin nüvə obyektlərinin xarici enerji təchizatının təmin olunması üçün həyati əhəmiyyət kəsb etdiyini bildirdiyi elektrik infrastrukturunun hədəfə alınmasının nüvə təhlükəsizliyi baxımından risk yaratdığı qeyd edilir.

Bəyanatda xatırladılır ki, mülki əhalinin və mülki infrastrukturun hədəf alınması beynəlxalq humanitar hüququn pozulmasıdır və müharibə cinayəti kimi qiymətləndirilə bilər. Rusiyanın bu hücumlardan ötrü məsuliyyət daşımalı olduğu və cəzasızlığın yolverilməz olduğu vurğulanır.

Bundan başqa, bəyanatda Rusiyaya hücumları dayandırmaq və danışıqlar prosesinə ciddi şəkildə qoşulmaq çağırışı edilir. Ölkələr Ukraynanın beynəlxalq hüquqa əsaslanan ədalətli və davamlı sülhə nail olmaq cəhdlərini dəstəklədiklərini bildiriblər.

Birgə bəyanat Albaniya, Andorra, Avstriya, Belçika, Bosniya və Herseqovina, Bolqarıstan, Kanada, Xorvatiya, Cənubi Kipr Rum Administrasiyası, Çexiya, Danimarka, Estoniya, Finlandiya, Fransa, Gürcüstan, Almaniya, Yunanıstan, İslandiya, İrlandiya, İtaliya, Latviya, Lixtenşteyn, Litva, Lüksemburq, Malta, Moldova, Monako, Niderland, Norveç, Polşa, Portuqaliya, Rumıniya, San-Marino, Slovakiya, Sloveniya, İspaniya, İsveç, İsveçrə, Ukrayna, Böyük Britaniya, eləcə də ATƏT-in Asiya tərəfdaşları olan Avstraliya və Yaponiya tərəfindən dəstəklənib.