Azərbaycan News Agency

BMT-nin İnsan Hüquqları Komissarı Volker Türk bazar günü qətllərin araşdırılması və cinayətkarların məsuliyyətə cəlb olunması üçün çağırış edib. "Qadınlar, uşaqlar və silahsız döyüşçülər də daxil olmaqla, ailələrin tamamilə öldürüldüyünə dair son dərəcə narahatedici hesabatlar alırıq. Suriyanın şimal-qərb sahil bölgələrində mülki vətəndaşların öldürülməsi dərhal dayandırılmalıdır," deyə o bildirib.

Toqquşmalar cümə axşamı, devrilmiş Əsəd rejimi ilə bağlı döyüşçülərin Latakiya vilayətində, sahil şəhəri Cabalada təhlükəsizlik qüvvələrinə pusqu qurması ilə başladı. Bu, azlıq təşkil edən Ələvilər də daxil olmaqla, qisas hücumlarına səbəb oldu. Bazar günü Əsəd tərəfdarlarının Baniyasdakı elektrik stansiyasına hücumundan sonra döyüşlər yenidən alovlandı.

Üsyanı yatırmaq üçün Suriya hökuməti əlavə qüvvələr çağırıb və minlərlə döyüşçü ölkənin hər yerindən Suriya sahillərinə axışıb. Bu döyüşçülər rəsmi olaraq yeni Suriya hökumətinin nəzarətində olsalar da, bəziləri keçmişdə insan hüquqlarının pozulmasına qarışmış nizam-intizamsız qruplardır.

Böyük Britaniyada yerləşən Suriya İnsan Hüquqları Müşahidə Mərkəzi (SOHR) xəbər verir ki, toqquşmalarda 745 mülki şəxs, 125 Suriya təhlükəsizlik qüvvəsi üzvü və 148 Əsəd tərəfdarı daxil olmaqla 1,000-dən çox insan öldürülüb.

Ölənlərin sayı ilə bağlı fərqli rəqəmlər var; digər hüquq təşkilatı olan Suriya İnsan Hüquqları Şəbəkəsi (SNHR) 148 mülki şəxsin Əsəd tərəfdarları tərəfindən öldürüldüyünü və Suriya təhlükəsizlik qüvvələrinin 327 mülki vətəndaş və əsir götürülmüş döyüşçünü öldürdüyünü bildirib.

Suriya hökuməti öz itkiləri ilə bağlı rəsmi məlumat açıqlamayıb.