Azərbaycan News Agency

Pakistanın Baş nazirinin müavini və xarici işlər naziri, senator Məhəmməd İshaq Dar Buğda üzrə Rəhbər Komitənin iclasına sədrlik etdi. Pakistan Xarici İşlər Nazirliyinin açıqlamasına əsasən, iclasda ölkə üzrə taxıl ehtiyatlarının vəziyyəti və daxili bazarda sabit tədarükün qorunmasına yönəlmiş idxal planları nəzərdən keçirildi.

Dar taxıl ehtiyatlarının kifayət qədər səviyyədə saxlanılmasının və tədarükdə fasilələrin qarşısının alınmasının hökumətin prioritetləri arasında olduğunu bildirdi. O, qiymətlərin əhali üçün əlçatan səviyyədə saxlanılması baxımından federal və əyalət qurumları arasında koordinasiyanın əhəmiyyətini vurğuladı.

Dar aidiyyəti rəsmilərə bazardakı dəyişiklikləri yaxından izləmək, kifayət qədər buğda tədarükünü təmin etmək və un qiymətlərinin azalma tendensiyasına keçməsinə nail olmaq tapşırığı verdi. İclasda Milli Ərzaq Təhlükəsizliyi və Tədqiqatlar naziri, Baş nazirin xüsusi köməkçisi Tariq Bacva, aidiyyəti nazirliklərin katibləri, həmçinin əyalətlərdən və müvafiq qurumlardan yüksəkvəzifəli şəxslər iştirak etdilər.