Azərbaycan News Agency

Suriya Prezidenti Əhməd əş-Şaraa Birləşmiş Millətlər Təşkilatının Baş Assambleyasının 81-ci sessiyası çərçivəsində Atlantik Şurası tərəfindən təşkil olunan dialoq sessiyasında iştirak edib.

Suriya Prezident Administrasiyasının açıqlamasında sessiyada Suriyanın gələcəyi, eləcə də önəmli siyasi və iqtisadi məsələlərin müzakirə edildiyi bildirilib.

Açıqlamaya görə, əş-Şaraa sessiya zamanı dövlət institutlarının qurulması, Suriyanın suverenliyinin möhkəmləndirilməsi və ərazi bütövlüyünün qorunması istiqamətində görülən işləri qiymətləndirib.

Əş-Şaraa həmçinin Suriyadakı bütün ictimai qrupların hüquqlarının təmin edilməsi, Suriyanın xarici hərbi mövcudluğa münasibəti və Suriya ərazisinə qarşı davam edən İsrail hücumları barədə fikirlərini bölüşüb.

Suriyanın hüquqlarının bərpasını təmin edəcək davamlı sülhə nail olmaq məqsədilə aparılan diplomatik səylər də sessiyada müzakirə olunub.

Sessiyada Suriyanın region ölkələri ilə münasibətləri də qiymətləndirilib. İqtisadi və ticarət əlaqələrinin gücləndirilməsində Suriyanın strateji mövqeyi, eləcə də Suriya ərazisi və limanları vasitəsilə neftin daşınmasına dair strateji layihələr müzakirə edilib.

Görüşdə həmçinin regional təhlükəsizlik və sabitliklə bağlı müxtəlif məsələlərin nəzərdən keçirildiyi bildirilib.