Azərbaycan News Agency

Hindistan Vaşinqtonla olan ticarət profisitini azaltmaq məqsədilə ABŞ-dən enerji idxalını artırır. Bu, Tramp administrasiyasının Yeni Dehli ilə apardığı ticarət danışıqları zamanı irəli sürdüyü əsas tələblərdən biri idi.

Puri elan etdiyi və “tarixdə bir ilk” kimi xarakterizə etdiyi razılaşmaya əsasən, Hindistana məxsus dövlət neft şirkətlərinin ABŞ-ın Körfəz sahilindən ildə təxminən 2,2 milyon ton LPG idxalı üçün bir illik müqavilə imzaladığını bildirib və əlavə edib: “Bu, Hindistan bazarı üçün ilk strukturlaşdırılmış ABŞ LPG müqaviləsi olacaq və alqı-satqı əməliyyatları LPG alışları üçün istinad nöqtəsi kimi Mount Belvieu qiymətinə əsasən həyata keçiriləcək.”

Ümumi LPG idxalı ildə təxminən 20–21 milyon ton olan Hindistanın bu həcmin 10 faizini ABŞ-dən təmin etməsi, mövcud qiymətlərlə ABŞ-dən əlavə təxminən 1 milyard dollarlıq idxal deməkdir.

Avqust ayından bəri, Vaşinqtonun Hindistan mallarına 50 faizlik gömrük rüsumu tətbiq etməyə başlamasından sonra ABŞ ilə Hindistan arasındakı əlaqələr gərginləşib. Ticarət balanssızlıqlarını aradan qaldırmaq və yerli sənayeni canlandırmaq məqsədi daşıyan geniş strategiyanın bir hissəsi kimi Hindistan ABŞ mallarına 25 faizlik qarşılıqlı gömrük rüsumu tətbiq edib, digər 25 faiz isə Hindistanın Rusiyadan neft idxalı ilə bağlı olmuşdur.

ABŞ Prezidenti Donald Tramp sentyabr ayında Hindistana yönəlik tənqidlərini gücləndirərək, ölkə ilə ticarət münasibətlərini “tamamilə birtərəfli bir fəlakət” kimi səciyyələndirib. Həmin ay ABŞ-da ticarət danışıqları aparan Hindistanın Ticarət naziri Piyuş Goyalın, Hindistanın qarşıdakı illərdə ABŞ ilə enerji məhsulları ticarətini artıracağını söylədiyi bildirilir.

ABŞ Prezidenti həmçinin Hindistanın “Rusiya nefti alışını böyük ölçüdə dayandırdığını” bəyan edib, lakin bu məlumat hələ ki, rəqəmlərlə təsdiqlənmir. Tankerlərin izlənməsi sistemi Kpler-in paylaşdığı məlumatlara görə, 17 noyabr tarixinə olan göstəricilərə əsasən, Hindistanın Rusiyadan xam neft idxalı oktyabr ayındakı 1,6 milyon barel/gün səviyyəsi ilə müqayisədə 1,85 milyon barel/gün həcmindədir və bu, nisbətən yüksək səviyyə olaraq qalır.

Hindistanın ABŞ-dən neft idxalı isə “oktyabr ayında kəskin artaraq 568 min barel/gün səviyyəsinə çatıb və bu rəqəm 2021-ci ilin fevral ayından bəri ən yüksək göstəricidir.”